विद्या किशोर म्हस्के यांच्या सेवानिवृत्ती सोहळ्याने आठवणींना उजाळा सासवड प्रतिनिधी : बापू मुळीक मुख्य संपादक पुरंदर प्राईम न्यूज: पुणे जिल्हा शिक्षण मंडळाचे शेठ गोविंद रघुनाथ साबळे कॉलेज ऑफ फार्मसी अँड पॉलिटेक्निक, सासवड येथे महाविद्यालयाच्या मुख्य लिपिका विद्या किशोर म्हस्के यांच्या ३५ वर्षांच्या प्रदीर्घ सेवेनिमित्त भावपूर्ण सेवानिवृत्ती व निरोप समारंभाचे आयोजन करण्यात आले.कार्यक्रमास पुणे जिल्हा शिक्षण मंडळाचे उपसचिव लक्ष्मण पवार, पुणे जिल्हा शिक्षण मंडळाचे शंकरराव उरसळ कॉलेज ऑफ फार्मास्युटिकल सायन्सेस अँड रिसर्च सेंटर, खराडीचे प्राचार्य डॉ. अशोक भोसले, डॉ. अश्विनी शेवाळे, तसेच शेठ गोविंद रघुनाथ साबळे कॉलेज ऑफ फार्मसी अँड पॉलिटेक्निक, सासवडच्या प्राचार्य डॉ. राजश्री चव्हाण, उपप्राचार्य डॉ. स्मिता पवार व विभागप्रमुख विशाखा गायकवाड यांची प्रमुख उपस्थिती होती.कार्यक्रमाचे सूत्रसंचालन व प्रास्ताविक विशाखा गायकवाड यांनी केले. कार्यक्रमाचे आयोजन प्रा. दिपाली जगताप, प्रा. पूजा पिसाळ व प्रा. जयश्री नाळे यांनी केले. यावेळी शिक्षक, शिक्षकेतर कर्मचारी व सहकाऱ्यांनी विद्या म्हस्के यांच्या ३५ वर्षांच्या प्रदीर्घ सेवाकाळातील आठवणींना उजाळा देत त्यांच्या कार्याचा गौरव केला. महाविद्यालयीन प्रशासकीय कामकाजात त्यांनी दिलेले योगदान, कर्तव्यनिष्ठा, शिस्तप्रियता, संयमी स्वभाव आणि सहकाऱ्यांशी असलेले आपुलकीचे संबंध यांचा उपस्थितांनी आवर्जून उल्लेख केला.प्राचार्य डॉ. राजश्री चव्हाण तसेच उपस्थित मान्यवरांनी विद्या म्हस्के यांच्या प्रदीर्घ सेवाकार्याचे कौतुक करून त्यांच्या पुढील आयुष्यासाठी मनःपूर्वक शुभेच्छा व्यक्त केल्या. यावेळी म्हस्के यांचा सन्मान करून त्यांना भावपूर्ण निरोप देण्यात आला. विद्या म्हस्के यांनी आपल्या मनोगतात महाविद्यालयातील ३५ वर्षांच्या सेवाकाळातील विविध अनुभव, सहकाऱ्यांकडून मिळालेले प्रेम व सहकार्य आणि अविस्मरणीय आठवणी भावपूर्ण शब्दांत व्यक्त केल्या. आपल्या सहकाऱ्यांशी असलेले ऋणानुबंध आठवताना वातावरण भावुक झाले.कार्यक्रमाचा समारोप उपप्राचार्य डॉ. स्मिता पवार यांच्या आभार प्रदर्शनाने झाला. उपस्थित सर्वांनी विद्या म्हस्के यांच्या पुढील आयुष्यासाठी आनंद, उत्तम आरोग्य, समाधान व सुख-समृद्धीच्या मनःपूर्वक शुभेच्छा दिल्या.
