वाघीरे महाविद्यालयात' आविष्कार' संशोधन स्पर्धेत १५७ संशोधन प्रकल्पांचे सादरीकरण सासवड प्रतिनिधी: बापू मुळीक मुख्य संपादक पुरंदर प्राईम न्यूज: सासवड येथील सावित्रीबाई फुले पुणे विद्यापीठाच्या निर्देशानुसार पुणे जिल्हा शिक्षण मंडळाच्या वाघीरे कला, वाणिज्य व विज्ञान महाविद्यालयात बुधवारी (दि. २३) महाविद्यालयीन स्तरावरील 'आविष्कार २०२६' संशोधन स्पर्धा उत्साहात पार पडली. शैक्षणिक संशोधन समिती (ARC) यांच्या वतीने आयोजित या स्पर्धेत विविध शाखांतील ३१४ विद्यार्थ्यांनी १५७ संशोधन प्रकल्प व पोस्टर्स सादर करून संशोधनातील नावीन्यपूर्ण कल्पना आणि वैज्ञानिक दृष्टिकोन प्रभावीपणे मांडला. या स्पर्धेचे उद्घाटन एम. एस. काकडे महाविद्यालयाचे प्राचार्य, सावित्रीबाई फुले पुणे विद्यापीठाच्या व्यवस्थापन परिषदेचे सदस्य डॉ. देविदास वायदंडे यांच्या हस्ते झाले. प्रमुख अतिथी एस. पी. महाविद्यालय, पुणे येथील प्रोफेसर, व्यवस्थापन परिषदेचे सदस्य डॉ. धोंडीराम पवार उपस्थित होते. महाविद्यालयाचे प्राचार्य, व्यवस्थापन परिषदेचे सदस्य डॉ. नितीन घोरपडे यांनी स्पर्धेच्या आयोजनासाठी मार्गदर्शन केले.प्रमुख पाहुणे डॉ. धोंडीराम पवार यांनी विद्यार्थ्यांनी संशोधनवृत्ती जोपासून नाविन्यपूर्ण आणि समाजोपयोगी संशोधन करावे, तसेच वैज्ञानिक दृष्टिकोनातून समस्यांवर उपाय शोधावेत, असे आवाहन केले. .आविष्कार’ संशोधन स्पर्धा ही विद्यार्थ्यांच्या संशोधनवृत्तीला चालना देणारे महत्त्वाचे व्यासपीठ आहे. विद्यार्थ्यांनी केवळ स्पर्धेच्या दृष्टीने प्रकल्प तयार न करता समाजातील विविध समस्या, गरजा आणि बदलत्या परिस्थितीचा अभ्यास करून नाविन्यपूर्ण संशोधन संकल्पना विकसित कराव्यात, असे विचार सावित्रीबाई फुले पुणे विद्यापीठ, आविष्कार संशोधन समितीचे अध्यक्ष डॉ. देविदास वायदंडे यांनी केले.यावर्षी स्पर्धेत मानव्यविद्या, भाषा व ललित कला विभागातील ४०, वाणिज्य, व्यवस्थापन व विधी विभागातील ३२, शुद्ध विज्ञान विभागातील ४०, कृषी व पशुसंवर्धन विभागातील ८ तसेच अभियांत्रिकी व तंत्रज्ञान विभागातील ३७ अशा एकूण १५७ संशोधन प्रकल्पांची नोंदणी झाली. विद्यार्थ्यांच्या उत्स्फूर्त सहभागातून त्यांची संशोधनवृत्ती, जिज्ञासा आणि सर्जनशील विचारसरणी अधोरेखित झाली.स्पर्धेचे परीक्षण डॉ. प्रकाश हुंबड, डॉ. दीपली हिरोळीकर, डॉ. संजू जाधव, डॉ. जयश्री जगताप आणि डॉ. गणेश निगडे या बहिस्थ परीक्षकांनी केले. परीक्षकांनी विद्यार्थ्यांच्या संशोधन प्रकल्पांचे मूल्यमापन करून त्यांना विधायक सूचना व शैक्षणिक मार्गदर्शन केले.यावेळी उपप्राचार्य डॉ. संजय झगडे व डॉ. बाबन माने, ए.आर.सी समन्वयक डॉ. संदीप राठोड, आयक्यूएसी समन्वयक डॉ. बजरंग शिंदे, विज्ञान शाखा समन्वयक प्रा. सचिनकुमार शहा, वाणिज्य शाखा समन्वयक डॉ. एन. एस. गिरी यांच्यासह प्राध्यापक, परीक्षक व विद्यार्थी मोठ्या संख्येने उपस्थित होते.कार्यक्रमाचे प्रास्ताविक डॉ. एस. बी. राठोड यांनी केले. सूत्रसंचालन डॉ. बी. एस. मदभावीकर यांनी केले, तर डॉ. किशोर लिपारे यांनी आभार मानले.