हिंदीचे ज्ञान रोजगाराची नवी दारे उघडणारे प्रभावी माध्यम : डॉ. शाकिर शेख सासवड प्रतिनिधी: बापू मुळीक मुख्य संपादक पुरंदर प्राईम न्यूज: वाघीरे महाविद्यालयात हिंदी सप्ताह उत्साहात; ‘हिंदी में रोजगार के सुअवसर’ विषयावर मार्गदर्शनसासवड : हिंदी ही केवळ संवादाची भाषा नसून शिक्षण, प्रशासन, पत्रकारिता, प्रसारमाध्यमे, अनुवाद, जाहिरात, प्रकाशन, पर्यटन तसेच डिजिटल माध्यमांसह विविध क्षेत्रांत रोजगाराच्या संधी उपलब्ध करून देणारी महत्त्वाची भाषा आहे. विद्यार्थ्यांनी हिंदी भाषेचे ज्ञान आत्मसात करण्याबरोबरच भाषिक व डिजिटल कौशल्ये विकसित करून बदलत्या रोजगाराच्या संधींचा लाभ घ्यावा, असे प्रतिपादन पूना कॉलेज, पुणे येथील प्रा. डॉ. शाकिर शेख यांनी केले.वाघीरे कला, वाणिज्य व विज्ञान महाविद्यालय, सासवड येथील हिंदी विभागाच्या वतीने आयोजित हिंदी सप्ताहांतर्गत ‘हिंदी में रोजगार के सुअवसर’ या विषयावर विशेष मार्गदर्शनपर कार्यक्रमाचे आयोजन करण्यात आले. यावेळी डॉ. शाकिर शेख प्रमुख वक्ते म्हणून विद्यार्थ्यांशी संवाद साधत होते.कार्यक्रमाच्या अध्यक्षस्थानी महाविद्यालयाचे उपप्राचार्य डॉ. प्रो.संजय झगडे होते. आपल्या अध्यक्षीय मनोगतात डॉ. प्रो. संजय झगडे यांनी हिंदी भाषेची उपयुक्तता आणि महत्त्व स्पष्ट केले. हिंदी ही भारतातील व्यापक जनसमुदायाशी जोडणारी प्रभावी संपर्कभाषा असून शिक्षण, व्यवसाय, प्रशासन आणि प्रसारमाध्यमांच्या क्षेत्रात तिचे महत्त्व सातत्याने वाढत आहे, असे त्यांनी सांगितले. विद्यार्थ्यांनी हिंदी भाषेकडे केवळ एक विषय म्हणून न पाहता तिच्याकडे ज्ञान, संवाद आणि रोजगाराच्या दृष्टीने पाहावे. भाषेवरील प्रभुत्वासोबतच आधुनिक तंत्रज्ञानाचा वापर करण्याचे कौशल्य विकसित केल्यास विद्यार्थ्यांच्या व्यक्तिमत्त्व विकासाबरोबरच करिअरच्या अनेक संधी उपलब्ध होतील, असेही त्यांनी नमूद केले.प्रमुख वक्ते डॉ. शाकिर शेख यांनी हिंदी भाषेच्या माध्यमातून उपलब्ध असलेल्या रोजगाराच्या विविध क्षेत्रांची विद्यार्थ्यांना सविस्तर माहिती दिली. पत्रकारिता, अनुवाद, अध्यापन, जाहिरात, वृत्तमाध्यमे, रेडिओ, दूरदर्शन, चित्रपट, प्रकाशन, पर्यटन, शासकीय व निमशासकीय कार्यालये, विविध कंपन्या तसेच सोशल मीडिया आणि डिजिटल कंटेंट निर्मिती या क्षेत्रांमध्ये हिंदी भाषेच्या ज्ञानाला मोठी मागणी असल्याचे त्यांनी स्पष्ट केले. बदलत्या तंत्रज्ञानाच्या काळात हिंदी भाषेचा वापर डिजिटल माध्यमांमध्ये मोठ्या प्रमाणावर वाढत असून विद्यार्थ्यांनी या संधी ओळखून स्वतःमध्ये आवश्यक कौशल्ये विकसित करावीत, असे आवाहन त्यांनी केले.कार्यक्रमाचे प्रास्ताविक हिंदी विभागप्रमुख डॉ. सुभाष नप्ते यांनी केले. त्यांनी हिंदी सप्ताहाच्या आयोजनामागील उद्देश स्पष्ट करताना विद्यार्थ्यांमध्ये हिंदी भाषेविषयी आस्था निर्माण करणे, भाषिक कौशल्यांचा विकास करणे आणि हिंदीच्या माध्यमातून उपलब्ध असलेल्या शैक्षणिक व व्यावसायिक संधींची माहिती करून देणे आवश्यक असल्याचे सांगितले.यावेळी विद्यार्थी श्रीनाथ लकडे व कु. सुचेता यांनी आपले मनोगत व्यक्त केले. कार्यक्रमाचे सूत्रसंचालन कु. अनिशा भिंताडे व अश्विनी गिरमे यांनी प्रभावीपणे केले, तर कु. मानसी थोरात यांनी उपस्थितांचे आभार मानले.कार्यक्रमास महाविद्यालयाचे समन्वयक डॉ. नरसिंह गिरी, विज्ञान विभागाचे समन्वयक प्रा. सचिनकुमार शाहा, डॉ. अनिल झोळ, प्रा. हुमेरा पानसरे, डॉ. नितिन लगड, डॉ. तुषार घोरपडे, डॉ. सुवर्णा खोडदे, डॉ. विजय पुणेकर, डॉ. दिपक उजागरे, डॉ. किरण गाढवे, डॉ. फटांगडे, प्रा. मेघा शिंदे, श्री. संतोष लोणकर, श्री.गणेश खोडके, श्री.धनु काका व तसेच विद्यार्थी मोठ्या संख्येने उपस्थित होते.हिंदी सप्ताहाच्या निमित्ताने आयोजित या कार्यक्रमातून विद्यार्थ्यांना हिंदी भाषेचे बदलत्या काळातील महत्त्व, तिची उपयुक्तता आणि हिंदीच्या माध्यमातून उपलब्ध होणाऱ्या रोजगाराच्या विविध संधींबाबत उपयुक्त मार्गदर्शन मिळाले. विद्यार्थ्यांच्या उत्स्फूर्त सहभागामुळे कार्यक्रम उत्साहपूर्ण वातावरणात संपन्न झाला. कार्यक्रमाच्या आयोजनासाठी महाविद्यालयाचे आदरणीय प्राचार्य डॉ. नितीन घोरपडे यांनी मार्गदर्शन केले.