प्रथिनयुक्त आहार निर्मितीची जिल्हास्तरीय स्पर्धा उत्साहात संपन्न सासवड प्रतिनिधी: बापू मुळीक मुख्य संपादक पुरंदर प्राईम न्यूज: राष्ट्रीय पोषण माह अंतर्गत एकात्मिक बाल विकास सेवा योजना (ICDS), महिला व बाल विकास विभाग, जिल्हा परिषद पुणे यांच्या वतीने THR (Take Home Ration) साहित्यामधून प्रथिनयुक्त आहार तयार करण्याची जिल्हास्तरीय स्पर्धा आज पुणे येथे उत्साहात पार पडली.“आहारातील विविधता आणि पुरेसे प्रथिने” या संकल्पनेवर आधारित या स्पर्धेचे आयोजन करण्यात आले होते. 'टेक होम रेशन 'रेसिपीचा प्रभावी वापर करून पौष्टिक, चविष्ट, आकर्षक व किफायतशीर आहार तयार करण्यास सहभागी अंगणवाडी सेविकांना प्रोत्साहन देणे हा या उपक्रमाचा मुख्य उद्देश होता.या स्पर्धेसाठी SNDT कॉलेज ऑफ होम सायन्स, पुणे येथील Human Ecology and Community Science विभागाच्या प्रमुख प्रा. डॉ. ललिता भगत यांना प्रमुख अतिथी व परीक्षक म्हणून आमंत्रित करण्यात आले होते.स्पर्धेतील पाककृतींचे परीक्षण करताना पोषणमूल्य, प्रथिनांचे प्रमाण, THR साहित्याचा वापर, चव, आकर्षकता, किफायतशीरपणा, पाककृती तयार करण्यासाठी लागणारा वेळ तसेच बालकांसाठी तिची उपयुक्तता या विविध निकषांचा विचार करण्यात आला.यावेळी मार्गदर्शन करताना प्रा. डॉ. ललिता भगत यांनी सांगितले की, बालकांच्या सर्वांगीण वाढीसाठी केवळ पोट भरणे पुरेसे नसून संतुलित व पोषणमूल्ययुक्त आहार मिळणे अत्यंत आवश्यक आहे. प्रथिने ही बालकांच्या शारीरिक वाढीसाठी, स्नायूंच्या विकासासाठी आणि रोगप्रतिकारक शक्तीसाठी महत्त्वाची आहेत. उपलब्ध THR साहित्याचा कल्पकतेने वापर करून विविध पौष्टिक पदार्थ तयार करता येतात, असे त्यांनी स्पष्ट केले.“आपले स्वयंपाकघर हीच आपल्या घरातील पहिली पोषण प्रयोगशाळा आहे. स्थानिक व सहज उपलब्ध डाळी, कडधान्ये, धान्ये, शेंगदाणे, तीळ आदी पदार्थांचा योग्य वापर करून पौष्टिक आहार तयार करता येतो,” असेही त्यांनी नमूद केले.अंगणवाडी सेविका या केवळ बालकांना आहार देणाऱ्या कार्यकर्त्या नसून पोषण व आरोग्य जनजागृतीच्या महत्त्वाच्या दूत आहेत, असे सांगून त्यांनी सर्व सहभागींचे कौतुक केले.या स्पर्धेमुळे THR साहित्याचा अधिक प्रभावी वापर, पौष्टिक आहाराबाबत जनजागृती आणि बालकांमधील कुपोषण प्रतिबंधासाठी नाविन्यपूर्ण पाककृतींची देवाणघेवाण होण्यास मदत झाली.कार्यक्रमात श्री आनंद खंडागळे, जिल्हा कार्यक्रमाधिकारी, श्री नितीन पवार विस्तार अधिकारी, तसेच महिला व बाल विकास विभागातील अधिकारी, अंगणवाडी सेविका तसेच संबंधित मान्यवर मोठ्या संख्येने उपस्थित होते.