श्रावणी अमावस्येनिमित्त श्रीनाथ म्हस्कोबा देवस्थानात भाविकांची गर्दीदर्शनासाठी विशेष नियोजन; अन्नदान महाप्रसादाचे आयोजन सासवड प्रतिनिधी: बापू मुळीक मुख्य संपादक पुरंदर प्राईम न्यूज: वीर, ता. पुरंदर, श्रावणी अमावस्येनिमित्त वीर येथील प्रसिद्ध श्रीनाथ म्हस्कोबा देवस्थानात भाविकांनी मोठी गर्दी केली. पहाटेपासूनच मंदिरात दर्शनासाठी भाविकांची मोठी रांग लागली होती. दूरवरून आलेल्या भाविकांनी श्रीनाथ म्हस्कोबा महाराजांचे दर्शन घेतले. गुरुवार व शुक्रवार दोन्ही दिवशी भाविकांनी मंदिरात दर्शनासाठी गर्दी केली. भाविकांची गैरसोय होऊ नये यासाठी श्रीनाथ म्हस्कोबा देवस्थान ट्रस्टच्या वतीने विशेष नियोजन करण्यात आले होते. मंदिर परिसरात भाविकांसाठी स्वच्छ पिण्याच्या पाण्याची व्यवस्था, स्वच्छतागृह, अतिरिक्त कर्मचारी तसेच दर्शन रांगेचे योग्य नियोजन करण्यात आले होते. गर्दीचे नियंत्रण व भाविकांना शिस्तबद्ध पद्धतीने दर्शन घेता यावे यासाठी होमगार्डची नियुक्ती करण्यात आली असल्याचे मुख्य विश्वस्त मोहनराव धुमाळ यांनी सांगितले. श्रावणी अमावस्येनिमित्त भाविकांसाठी अन्नदान महाप्रसादाचे आयोजन करण्यात आले. या अन्नदानासाठी अन्नदाते नेताजी बबुराव धुमाळ (वाडकर परिवार) यांचे सहकार्य लाभले. भाविकांनी महाप्रसादाचा लाभ घेतला. दिवसभर मंदिर परिसरात भक्तिमय वातावरण निर्माण झाले होते. भाविकांच्या वाढत्या गर्दीच्या पार्श्वभूमीवर देवस्थान प्रशासनाने केलेल्या नियोजनामुळे दर्शन व्यवस्था सुरळीतपणे पार पडली.यावेळी देवस्थान ट्रस्टचे विश्वस्त सुनील धुमाळ व सर्व सहकारी उपस्थित होते.