पुरंदर क्रिकेट अकॅडमीच्या राजवीर फडतरेची महाराष्ट्र क्रिकेट असोसिएशनच्या अंडर-१४ स्पर्धेसाठी साई क्रिकेट क्लबच्या संघात निवड सासवड प्रतिनिधी: बापू मुळीक मुख्य संपादक पुरंदर प्राईम न्यूज : सासवड येथील पुरंदर क्रिकेट अकॅडमीचा होतकरू आणि अष्टपैलू क्रिकेटपटू राजवीर रवी फडतरे याची महाराष्ट्र क्रिकेट असोसिएशन (MCA) तर्फे आयोजित अंडर-१४ स्पर्धेसाठी साई क्रिकेट क्लबच्या संघात निवड झाली आहे. या स्पर्धेतील सामने लवकरच खेळविण्यात येणार असून, त्यामध्ये राजवीर साई क्रिकेट क्लबच्या अंडर-१४ संघातून खेळणार आहे. ही निवड चाचणी दि. २ ऑगस्ट २०२६ रोजी साई स्पोर्ट्स टर्फ, बर्ड व्हॅली रोड, पिंपळे सौदागर, पुणे येथे पार पडली. या निवड प्रक्रियेसाठी महाराष्ट्रातील विविध जिल्ह्यांतून जवळपास ३०० खेळाडूंनी सहभाग घेतला होता. अत्यंत स्पर्धात्मक वातावरणात झालेल्या निवड चाचणीत उत्कृष्ट अष्टपैलू खेळाचे प्रदर्शन करत राजवीरने अंतिम संघात स्थान मिळवले. या निवडीमुळे पुरंदर क्रिकेट अकॅडमी तसेच संपूर्ण सासवड परिसरात आणि पुरंदर तालुक्यात आनंदाचे वातावरण आहे. अवघ्या ९ वर्षांच्या राजवीरने आपल्या क्रिकेट कारकिर्दीत आतापर्यंत ९४ सामने खेळत २३७ धावा आणि ७५ बळी अशी उल्लेखनीय कामगिरी नोंदवली आहे. लहान वयातच सातत्यपूर्ण आणि प्रभावी अष्टपैलू कामगिरीमुळे तो आश्वासक क्रिकेटपटू म्हणून ओळख निर्माण करत आहे. नुकत्याच नेहरू स्टेडियम, पुणे येथे झालेल्या सद्भावना करंडक अंडर-११ क्रिकेट स्पर्धेत राजवीरने ६२ धावा, ११ बळी आणि ५ झेल अशी शानदार कामगिरी केली. या उत्कृष्ट प्रदर्शनाबद्दल त्याला 'स्पर्धेतील उत्कृष्ट खेळाडू' हा मानाचा पुरस्कारही प्रदान करण्यात आला. राजवीरच्या या यशामागे त्याची जिद्द, सातत्यपूर्ण सराव, मेहनत आणि पुरंदर क्रिकेट अकॅडमीचे मुख्य प्रशिक्षक राजेश विनायक साळुंके यांचे मोलाचे मार्गदर्शन लाभले आहे. तसेच पुरंदर क्रिकेट अकॅडमीचे संस्थापक, माजी आमदार संजयजी चंदूकाका जगताप यांचे सातत्यपूर्ण सहकार्य, प्रोत्साहन आणि खेळाडूंना उपलब्ध करून दिलेल्या उत्तम क्रीडा सुविधा यांचाही या यशात मोठा वाटा आहे. राजवीर रवी फडतरे यांच्या या उल्लेखनीय यशाबद्दल त्यांचे पालक, मुख्य प्रशिक्षक राजेश विनायक साळुंके, पुरंदर क्रिकेट अकॅडमीचे संस्थापक माजी आमदार श्री. संजयजी चंदूकाका जगताप, राजवीरचे आजोबा , श्रीक्षेत्र कानिफनाथ गड नवनाथ देवस्थान पंचायत कमिटी ट्रस्ट उपाध्यक्ष दीपक फडतरे तसेच संपूर्ण अकॅडमी परिवाराचे सर्व स्तरांतून अभिनंदन होत आहे. आगामी अंडर-१४ स्पर्धेत राजवीर उत्कृष्ट कामगिरी करून पुरंदर तालुका आणि महाराष्ट्राचे नाव उज्ज्वल करेल असा विश्वास व्यक्त केला जात आहे.फोटो - राजवीर फडतरे