सासवड हद्दवाढीत नागरी सुविधांचा बोजवारा: संतप्त महिलांचा नगरपरिषदेत ठिय्या सासवड प्रतिनिधी: बापू मुळीक मुख्य संपादक पुरंदर प्राईम न्यूज: सासवड शहराच्या हद्दवाढ भागात गेल्या आठवडाभरापासून कचरा संकलन ठप्प झाल्याने, तसेच अनेक वर्षांपासूनच्या प्रलंबित समस्यांमुळे त्रस्त झालेल्या महिलांनी थेट सासवड नगरपरिषदेत धडक मारत ठिय्या आंदोलन केले. रस्ते, ड्रेनेज आणि कचऱ्याच्या समस्येवरून प्रशासनाच्या गलथान कारभाराचा यावेळी तीव्र निषेध नोंदवण्यात आला.हद्दवाढ भागातील नागरिक गेल्या अनेक वर्षांपासून मूलभूत सुविधांपासून वंचित आहेत. सद्यस्थितीत खालील समस्यांमुळे नागरिकांना नरकयातना भोगाव्या लागत आहेत: • कचऱ्याचे ढीग: गेल्या ७-८ दिवसांपासून या भागात घंटागाडी फिरकली नसल्याने, सर्वत्र कचरा साचला असून, परिसरात प्रचंड दुर्गंधी पसरली आहे. • २० वर्षांचे खड्डेमय रस्ते: गेली दोन दशके या भागातील रस्त्यांची अवस्था अत्यंत दयनीय असून, अद्याप रस्ते दुरुस्तीचे काम झालेले नाही. • ड्रेनेजची दुर्दशा: भूमिगत गटार योजनेचा अभाव असल्याने पावसाळ्यात आणि एरवीही रस्त्यांवर सांडपाणी आणि चिखल साचत आहे, ज्यामुळे आरोग्याचा गंभीर प्रश्न निर्माण झाला आहे.प्रशासनाच्या ढिसाळ कारभारामुळे संयमाचा बांध फुटलेल्या महिलांनी अधिकाऱ्यांना धारेवर धरत खालील मागण्या मांडल्या:• दररोज नियमितपणे घंटागाडी सुरू करून साचलेल्या कचऱ्याची तत्काळ विल्हेवाट लावावी.• गेल्या २० वर्षांपासून प्रलंबित असलेला रस्त्यांचा प्रश्न तातडीने मार्गी लावावा.• आरोग्याचा धोका टाळण्यासाठी परिसरात योग्य ड्रेनेज व्यवस्था त्वरित उभी करावी.• नागरिकांच्या समस्यांकडे जाणीवपूर्वक दुर्लक्ष करणाऱ्या अधिकाऱ्यांवर कारवाई करावी.नगरपरिषद प्रशासनाने या मागण्यांची तत्काळ दखल घेऊन कार्यवाही न केल्यास, यापुढे अधिक तीव्र स्वरूपाचे जनआंदोलन छेडण्यात येईल, असा सज्जड इशारा संतप्त महिलांनी दिला आहे.या आंदोलनात नगरसेविका हेमलता इनामके, नगरसेविका दिपाली जगताप, सुरेखा जगताप, जयश्री जगताप, संगीता भिंताडे, भाग्यश्री जगताप, दीपाली खेनट, सविता फडतरे, सुनिता महामुनी, योगिता काकडे, सुनिता यादव, अपेक्षा जगताप, अर्चना जगताप, अंकिता जगताप यांच्यासह बोरकर आजी, भुजबळ मावशी व इतर महिला मोठ्या संख्येने सहभागी झाल्या होत्या.महिलांचा वाढता रोष पाहता, नगरपरिषदेचे कर्मचारी ओंकार शिंदे आणि नगरसेवक राजन जगताप यांनी प्रशासनाच्या वतीने पुढील सात दिवसांत ही कामे मार्गी लावण्याचे आश्वासन दिले आहे.