वाघिरे महाविद्यालयात पीएच.डी. कोर्सवर्कचा समारोप समारंभ उत्साहात संपन्न सासवड प्रतिनिधी: बापू मुळीक मुख्य संपादक पुरंदर प्राईम न्यूज: पुणे जिल्हा शिक्षण मंडळाच्या वाघिरे कला, वाणिज्य व विज्ञान महाविद्यालय, सासवड येथील रसायनशास्त्र विभाग व संशोधन केंद्राच्या वतीने पीएच.डी. कोर्सवर्क-२०२६ या अभ्यासक्रमाचा समारोप समारंभ सोमवार, दि. २४ ऑगस्ट २०२६ रोजी उत्साहपूर्ण आणि शैक्षणिक वातावरणात संपन्न झाला. ८ जून २०२६ ते १४ ऑगस्ट २०२६ या कालावधीत आयोजित करण्यात आलेल्या या कोर्सवर्कमध्ये ३८ संशोधक विद्यार्थ्यांनी सहभाग घेतला होता. संशोधक विद्यार्थ्यांना संशोधन पद्धती, प्रगत विश्लेषणात्मक तंत्रे, संशोधन नैतिकता, साहित्य समीक्षा, वैज्ञानिक लेखन, संशोधनातील आधुनिक साधने आणि विविध अत्याधुनिक विश्लेषणात्मक तंत्रज्ञान याबाबत मार्गदर्शन करण्यात आले. कार्यक्रमाची सुरुवात डॉ. बी. एल. शिंदे यांच्या प्रास्ताविकाने झाली. त्यांनी पीएच.डी. कोर्सवर्कच्या आयोजनामागील उद्देश स्पष्ट करताना संशोधक विद्यार्थ्यांना संशोधनाच्या मूलभूत संकल्पनांपासून अत्याधुनिक संशोधन पद्धतींपर्यंत विविध विषयांचे शास्त्रशुद्ध प्रशिक्षण देण्यात आल्याचे सांगितले. कार्यक्रमाचे प्रमुख पाहुणे डॉ. रावसाहेब लटपटे, अधिष्ठाता, विज्ञान व तंत्रज्ञान विद्याशाखा, सावित्रीबाई फुले पुणे विद्यापीठ, पुणे यांनी आपल्या मार्गदर्शनपर भाषणातून संशोधक विद्यार्थ्यांना संशोधनाच्या पुढील वाटचालीसाठी मोलाचे मार्गदर्शन केले. त्यांनी संशोधनामध्ये नावीन्य, सातत्य, वैज्ञानिक दृष्टिकोन, अचूकता, संशोधन नैतिकता आणि गुणवत्तेला* विशेष महत्त्व असल्याचे स्पष्ट केले. संशोधकांनी केवळ पदवी मिळविण्याच्या उद्देशाने नव्हे, तर समाज आणि राष्ट्राच्या विकासाला हातभार लावणारे गुणवत्तापूर्ण व उपयुक्त संशोधन करण्यासाठी प्रयत्नशील राहावे, असे आवाहन त्यांनी केले. संशोधक विद्यार्थ्यांनी आपल्या विषयातील अद्ययावत घडामोडींचा सतत अभ्यास करून आंतरराष्ट्रीय दर्जाचे संशोधन करण्याचा प्रयत्न करावा, असेही त्यांनी नमूद केले.अध्यक्षीय मनोगतात महाविद्यालयाचे प्राचार्य डॉ. पंडित शेळके यांनी पीएच.डी. संशोधक विद्यार्थ्यांचे अभिनंदन करून त्यांच्या पुढील संशोधन प्रवासासाठी शुभेच्छा दिल्या. महाविद्यालयामध्ये संशोधनासाठी पोषक वातावरण निर्माण करण्यासाठी रसायनशास्त्र विभाग व संशोधन केंद्र सातत्याने कार्यरत असल्याचे त्यांनी सांगितले. विद्यार्थ्यांनी कोर्सवर्कदरम्यान प्राप्त केलेले ज्ञान आपल्या संशोधनामध्ये प्रभावीपणे वापरून दर्जेदार संशोधन प्रकाशित करावे आणि महाविद्यालयाचे नाव राष्ट्रीय व आंतरराष्ट्रीय स्तरावर उज्ज्वल करावे, असे आवाहन त्यांनी केले. ८ जून ते १४ ऑगस्ट २०२६ या कालावधीत पार पडलेल्या या कोर्सवर्कमध्ये विविध विषयांवरील तज्ज्ञांची व्याख्याने, मार्गदर्शनपर सत्रे, संशोधनविषयक चर्चा, सादरीकरणे आणि शैक्षणिक उपक्रम आयोजित करण्यात आले. संस्था पदाधिकारी, प्राचार्य डॉ. पंडित शेळके, उपप्राचार्य डॉ. बी. यु. माने, डॉ. एस. एच. झगडे यांचे मार्गदर्शनाखाली सदर कोर्सवर्क यशस्वीपणे राबविला गेला. सदर समारोप कार्यक्रमासाठी डॉ. एस. एच. झगडे, डॉ. एन.एस. गिरी, डॉ. एन. आर. कांबळे, प्राध्यापक व विध्यार्थी उपस्थित होते. कार्यक्रमाचे प्रास्ताविक डॉ. संदीप राठोड यांनी, प्रा. जी. एम. अहिवळे यांनी प्रमुख पाहुण्यांचा परिचय करून दिला तर आभार प्रदर्शन डॉ. शितल कल्हापूरे यांनी केले. सदर कार्यक्रम यशस्वी करण्यासाठी महाविद्यालयातील सेवकांचे मोलाचे सहकार्य लाभले.