श्रीनाथ म्हस्कोबा देवस्थान वीर येथे काळूबाई मंदिराचा कलशारोहण व जीर्णोद्धार सोहळा उत्साहात सासवड प्रतिनिधी: बापू मुळीक मुख्य संपादक पुरंदर प्राईम न्यूज : वीर, ता. पुरंदर येथील पश्चिम महाराष्ट्रातील श्रद्धास्थान असलेल्या श्रीनाथ म्हस्कोबा देवस्थान वीर येथे काळूबाई मंदिराचा कलशारोहण व जीर्णोद्धार सोहळा अत्यंत भक्तिमय व उत्साहपूर्ण वातावरणात संपन्न होत आहे. सोहळ्यानिमित्त मंदिर परिसरात भाविकांची मोठी गर्दी झाली असून, संपूर्ण वीर नगरी भक्तिमय वातावरणाने भारावून गेली आहे.सोहळ्याच्या पूर्वसंध्येला रविवारी दुपारी ३ वाजता काळूबाई मंदिराच्या कलशाची भव्य ग्रामप्रदक्षिणा काढण्यात आली. गावाच्या कमानीपासून सुरू झालेली ही मिरवणूक माळवाडी नगारखाना, मंदिरासमोरून गावातील प्रमुख मार्गाने पुढे जात पूर्णगंगा नदीच्या मार्गाने मंदिराच्या दक्षिण दरवाजातून मंदिर परिसरात दाखल झाली. यावेळी कलशाचे विधिवत धान्याधिवास करण्यात आले.पारंपरिक ढोल-ताशे, संबळ व सनईच्या गजरात निघालेल्या या भव्य मिरवणुकीत मानकरी, सालकरी, दागिनदार, भाविक व ग्रामस्थ मोठ्या संख्येने सहभागी झाले होते. वाजत-गाजत निघालेल्या या मिरवणुकीमुळे संपूर्ण गावात उत्साहाचे व भक्तिमय वातावरण निर्माण झाले होते.आज सोमवारी सकाळी ६ वाजल्यापासून श्रीनाथ म्हस्कोबा मंदिर परिसरात होम-हवन, यज्ञ, कलशपूजन व कलशारोहणाच्या धार्मिक विधींना सुरुवात झाली. देवस्थान ट्रस्टच्या वतीने मंदिराला आकर्षक फुलांची सजावट, विद्युत रोषणाई तसेच भव्य मंडप उभारण्यात आला होता. तसेच यासाठी मान्ध्र्देव संस्थानचे मुख्य पुजारी सोमनाथ गुरव या सोहळ्याला उपस्थित होते. कलशपूजनाचा मान पुण्यश्लोक अहिल्यादेवी होळकर, इंदूर या ऐतिहासिक घराण्याचे वंशज श्रीमंत भूषणसिंह राजे होळकर यांच्या हस्ते, तसेच मानकरी, सालकरी, दागिनदार, भाविक व ग्रामस्थांच्या उपस्थितीत पार पडला. धार्मिक विधींमध्ये देवस्थानचे विश्वस्त, सल्लागार मंडळ, वाघ परिवार,सर्व पालखीचे सहकारी तसेच प्रतिष्ठित मान्यवर व ग्रामस्थ मोठ्या संख्येने सहभागी झाले.या सोहळ्यानिमित्त महाप्रसादाचे आयोजन समस्त वाघ परिवाराच्या वतीने करण्यात आले होते. भाविकांनी मोठ्या संख्येने उपस्थित राहून महाप्रसादाचा लाभ घेतला. वाघ परिवाराने याकामी मोलाचे योगदान केल्याचे देवस्थानचे चेअरमन मोहनराव धुमाळ यांनी सांगितले. यावेळी देवस्थान ट्रस्टच्या वतीने मोहनराव रावसाहेब धुमाळ, सहकारी विश्वस्त सुनील धुमाळ, विराज धुमाळ, काशिनाथ धुमाळ, बाळासाहेब समगीर, अमोल धो. धुमाळ, प्रसाद धुमाळ, अमोल आ. धुमाळ, प्रमिला देशमुख, जयवंत सोनावणे, तसेच सल्लागार मंडळाचे रामभाऊ धुमाळ, तानाजी धुमाळ, बाळासाहेब धुमाळ यांच्यासह मानकरी, सालकरी, दागिनदार, ग्रामस्थ व भाविक उपस्थित होते.काळूबाई मंदिराच्या जीर्णोद्धारानंतर पार पडलेल्या या कलशारोहण सोहळ्यामुळे वीर गावाच्या धार्मिक व सांस्कृतिक परंपरेला नवी झळाळी मिळाली असून, ‘श्रीनाथ म्हस्कोबा महाराज की जय’ आणि ‘काळूबाई माता की जय’ अशा जयघोषांनी मंदिर परिसर दुमदुमून गेला. अत्यंत शिस्तबद्ध, भव्य आणि भक्तिमय वातावरणात हा सोहळा पार पडत असून भाविकांमध्ये मोठा उत्साह पाहायला मिळत आहे.