गुरुवर्य बाबुराव जगताप यांच्या १३८व्या जयंतीनिमित्त पूर्णाकृती पुतळ्यास पुष्पहार सासवड प्रतिनिधी:बापू मुळीक मुख्य संपादक पुरंदर प्राईम न्यूज: समाजसुधारक श्री शिवाजी मराठा स्कूलचे संस्थापक आणि पुण्याचे माजी महापौर गुरुवर्य कै. बाबुराव गणपतराव जगताप यांच्या १३८व्या जयंतीनिमित्त अखिल भारतीय मराठा महासंघाच्या वतीने तहसील कार्यालय, वनराज मंडळ येथील त्यांच्या पूर्णाकृती पुतळ्यास पुष्पहार अर्पण करून अभिवादन करण्यात आले. गुरुवर्य बाबुराव जगताप यांनी बहुजन समाजाच्या शैक्षणिक व सामाजिक उन्नतीसाठी आपले संपूर्ण आयुष्य समर्पित केले. १९१८ मध्ये त्यांनी श्री शिवाजी मराठा स्कूलची स्थापना करून वंचित व सर्वसामान्य विद्यार्थ्यांसाठी शिक्षणाची दारे खुली केली. पुढे श्री शिवाजी मराठा सोसायटीसह विविध शैक्षणिक संस्थांच्या उभारणीत त्यांनी महत्त्वपूर्ण योगदान दिले. शिक्षक आणि विद्यार्थ्यांच्या प्रबोधनासाठी त्यांनी ‘शिक्षक’ मासिक सुरू केले. कोल्हापूर संस्थानचे शिक्षणाधिकारी तसेच श्री शिवाजी प्रिपरेटरी मिलिटरी स्कूलचे पहिले भारतीय प्राचार्य म्हणूनही त्यांनी काम केले. १९६२ मध्ये पुणे महानगरपालिकेचे महापौर म्हणून त्यांनी उल्लेखनीय काम केले. साधी राहणी, तत्त्वनिष्ठ सार्वजनिक जीवन आणि समाजसेवेची तळमळ ही त्यांच्या व्यक्तिमत्त्वाची वैशिष्ट्ये होती. शिक्षणाच्या माध्यमातून समाजपरिवर्तन घडविण्याचा त्यांचा विचार आजही प्रेरणादायी आहे. यावेळी अखिल भारतीय मराठा महासंघाचे महाराष्ट्र प्रदेश उपाध्यक्ष अजय आबा पाटील, राष्ट्रीय संघटक सचिव डॉ. वैभव शिळीमकर, प्रा. दीपक सुरवसे, नगरसेविका स्नेहा ताई माळवदे, समाजसेवक नामदेवराव माळवदे, विश्रामबाग क्षेत्रीय अधिकारी गुरम साहेब, श्री शिवाजी मराठा संस्थेचे विश्वस्त मा. विकासराव गोगावले, मा. जगदीशराव जेधे, मा. सत्येंद्र कांचन, मा. ॲड. एन. डी. पाटील, मा. आबा जगताप, प्रा. प्रतिभाताई परदेशी, मा. संदेश दिवेकर यांच्यासह विद्यार्थी, प्राध्यापक व संघटनेचे पदाधिकारी उपस्थित होते. याप्रसंगी पुण्यतिथीपर्यंत श्री शिवाजी मराठा सोसायटीच्या सर्व शाखांमध्ये गुरुवर्य बाबुराव जगताप यांच्या प्रतिमा भेट देऊन लावण्यात येतील, अशी माहिती अजयआबा पाटील यांनी दिली. कार्यक्रमाचे संयोजन अखिल भारतीय मराठा महासंघाचे पुणे जिल्हाध्यक्ष संजय दादा पासलकर व त्यांच्या सहकाऱ्यांनी केले.