महाराष्ट्र राज्य शिक्षक परिषदेचे शैक्षणिक क्षेत्रात मोठे योगदान - शिवहार लहानेसासवड येथे महाराष्ट्र राज्य शिक्षक परिषद पुणे विभागाच्या वार्षिक नियोजन बैठकीचे आयोजन सासवड प्रतिनिधी : बापू मुळीक मुख्य संपादक पुरंदर प्राईम न्यूज: महाराष्ट्र राज्य शिक्षक परिषदेची पुणे विभागाची वार्षिक नियोजनाची बैठक सासवड येथील म.ए.सो. वाघीरे विद्यालयात दि. १ व २ ऑगस्ट २०२६ रोजी आयोजित करण्यात आली आहे. या बैठकीसाठी पुणे विभागातील सातारा,सांगली, कोल्हापूर, सोलापूर व पुणे या जिल्ह्यातील महाराष्ट्र राज्य शिक्षक परिषदेचे प्रमुख पदाधिकारी उपस्थित राहणार असून या दोन दिवसीय बैठकीत राज्यातील शिक्षण क्षेत्रातील विविध ज्वलंत प्रश्नांसंदर्भात विचारमंथन होणार आहे. शनिवार दिनांक १ ऑगस्ट रोजी महाराष्ट्र राज्य शिक्षक परिषदेचे प्रांत अध्यक्ष वेणूनाथ कडू, पुणे विभागाचे माजी शिक्षक आमदार भगवानराव साळुंखे यांच्या प्रमुख उपस्थितीत बैठकीचे उद्घाटन सत्र संपन्न होणार आहे. या बैठकीत महाराष्ट्र राज्य कोषाध्यक्ष राजेंद्र सूर्यवंशी, राज्य कार्याध्यक्ष गुलाबराव गवळे, शिक्षक परिषदेचे राज्य संघटन मंत्री किरण भावठाणकर आदींचे मार्गदर्शन लाभणार आहे. पुणे विभागातील सर्व जिल्ह्यातील प्रमुख पदाधिकारी सुद्धा मोठया संख्येने उपस्थित राहणार असून नोव्हेंबर २०२६ मध्ये महाराष्ट्र विधान परिषदेच्या पुणे विभागाच्या शिक्षक मतदार संघाच्या निवडणुकीच्या अनुषंगाने देखील ही बैठक महत्त्वाची मानली जात आहे. महाराष्ट्र राज्य शिक्षक परिषद गेल्या अनेक वर्षांपासून शिक्षण क्षेत्रात राष्ट्रहित, शिक्षणहित व शिक्षकहित या उद्देशाने अविरतपणे कार्य करत असून शिक्षण क्षेत्रातील अनेक सकारात्मक बदल या शिक्षक संघटनेच्या पुढाकारने झालेले असून महाराष्ट्र राज्य शिक्षक परिषदेचे राज्याच्या शिक्षण क्षेत्रात आजपर्यंत मोठे योगदान असल्याचे मत महाराष्ट्र शिक्षक परिषदेचे पुणे जिल्हा कार्यवाह शिवहार लहाने यांनी बोलताना व्यक्त केले. पुणे विभागाच्या बैठकीसाठी महाराष्ट्र राज्य शिक्षक परिषदेचे पुणे विभागाचे अध्यक्ष सुरेश राठोड, कार्यवाह बाळासाहेब चोपडे, विभाग कार्याध्यक्ष अमित कुलकर्णी,उपाध्यक्ष विजयकुमार माने, संदीप काळे , विभाग कोषाध्यक्ष महेश शेलार, संजीव मांढरे, संघटन मंत्री रामदास अभंग, सहकार्यवाह मोहन ओमासे, विभाग महिला आघाडी प्रमुख अंजली गोरे, सहप्रमुख श्लेषा कारंडे, सुजाता कुलकर्णी आदीं पदाधिकारी उपस्थित राहणार आहेत.