योग दिनानिमित्त साबळे कॉलेज ऑफ फार्मसीत जनजागृती कार्यक्रम सासवड प्रतिनिधी : बापू मुळीक मुख्य संपादक पुरंदर प्राईम न्यूज: सासवड येथील पुणे जिल्हा शिक्षण मंडळाच्या शेठ गोविंद रघुनाथ साबळे कॉलेज ऑफ फार्मसी अँड पॉलिटेक्निक, सासवड येथे आंतरराष्ट्रीय योग दिनानिमित्त उत्साहपूर्ण वातावरणात विशेष योग व आरोग्य जनजागृती कार्यक्रमाचे आयोजन करण्यात आले. विद्यार्थ्यांमध्ये शारीरिक, मानसिक व भावनिक स्वास्थ्याबाबत जागरूकता निर्माण करण्याच्या उद्देशाने हा कार्यक्रम आयोजित करण्यात आला.यंदाच्या आंतरराष्ट्रीय योग दिनाची संकल्पना "Yoga for One Earth, One Health" ही असून त्यानिमित्त विद्यार्थ्यांना योगाचे महत्त्व, निरोगी जीवनशैली आणि तणावमुक्त जीवनासाठी योगाची उपयुक्तता याविषयी मार्गदर्शन करण्यात आले.कार्यक्रमासाठी आर्ट ऑफ लिव्हिंगचे फॅसिलिटेटर श्री. हृषीकेश शाह हे प्रमुख मार्गदर्शक म्हणून उपस्थित होते. त्यांनी योग, प्राणायाम, ध्यान आणि सकारात्मक विचारसरणी यांचे महत्त्व पटवून देत विद्यार्थ्यांना विविध योगासने व श्वसनक्रियांचे प्रात्यक्षिक करून दाखविले. नियमित योगाभ्यासामुळे शारीरिक तंदुरुस्तीबरोबरच मानसिक एकाग्रता, आत्मविश्वास आणि कार्यक्षमता वाढण्यास मदत होते, असे त्यांनी सांगितले.प्राचार्या डॉ. राजश्री चव्हाण यांनी विद्यार्थ्यांनी निरोगी व संतुलित जीवनासाठी नियमित योगाभ्यासाचा अंगीकार करावा, असे आवाहन केले. तर उपप्राचार्या डॉ. स्मिता पवार यांनी योगामुळे मानसिक स्वास्थ्य, एकाग्रता आणि सकारात्मकता वृद्धिंगत होत असल्याचे सांगितले.या कार्यक्रमास महाविद्यालयाच्या प्राचार्या डॉ. राजश्री चव्हाण, पॉलिटेक्निक विभागाच्या प्राचार्या विशाखा गायकवाड, उपप्राचार्या डॉ. स्मिता पवार, प्राध्यापक, शिक्षकेतर कर्मचारी तसेच उपस्थित होते.कार्यक्रमाच्या यशस्वी आयोजनासाठी सर्व शिक्षक व कर्मचाऱ्यांनी विशेष परिश्रम घेतले. शेवटी सर्वांनी नियमित योगाभ्यास करण्याचा संकल्प करून निरोगी जीवनाचा संदेश दिला.