सिद्धेश्वर तलाव परिसरात जुगार अड्ड्यावर पोलिसांचा छापा; ८ जणांवर गुन्हा दाखल सासवड प्रतिनिधी: बापू मुळीक मुख्य संपादक पुरंदर प्राईम न्यूज: सासवड पोलिसांनी सिद्धेश्वर तलाव परिसरात सुरू असलेल्या अवैध जुगार अड्ड्यावर छापा टाकून आठ जणांविरुद्ध कारवाई केली. या कारवाईत रोख रक्कम, मोबाईल फोन आणि जुगाराचे साहित्य असा एकूण ३ लाख ८१ हजार ५७० रुपयांचा मुद्देमाल जप्त करण्यात आला आहे.याबाबत सासवड पोलीस स्टेशन येथे गुन्हा रजिस्टर क्रमांक २७२/२०२६ नुसार महाराष्ट्र जुगार प्रतिबंध अधिनियम कलम १२ (अ) अंतर्गत गुन्हा दाखल करण्यात आला आहे. पोलीस कॉन्स्टेबल किरण हनुमंत तुपे यांनी सरकारतर्फे फिर्याद दिली आहे.पोलीस निरीक्षक संतोष घोळवे यांना मिळालेल्या गोपनीय माहितीनुसार उपविभागीय पोलीस अधिकारी राजेंद्रसिंह गौर यांच्या मार्गदर्शनाखाली विशेष पथकाने जुना कोडीत रोड, सिद्धेश्वर मंदिर रोड परिसरातील शेतामध्ये छापा टाकला. यावेळी आठ जण तीन पत्ती नावाचा जुगार खेळताना आढळून आले.कारवाईदरम्यान १ लाख ४८ हजार ४१० रुपये रोख रक्कम, २ लाख ३३ हजार रुपयांचे सहा मोबाईल फोन तसेच जुगारासाठी वापरण्यात येणारे पत्त्यांचे आठ कॅट जप्त करण्यात आले.या प्रकरणी भरत बबन मोडक, मंगेश रमेश खपर्डे, पुरुषोत्तम गणपत जाधव, चंद्रकांत शंकर भिंताडे, रतन आप्पा बडधे, दत्तात्रय साहेबराव वायकर, निलेश बाळासाहेब जगताप आणि निरंजन संभाजी गायकवाड यांच्याविरुद्ध गुन्हा दाखल करण्यात आला आहे.या कारवाईत पोसई अर्चना पाटील, पोहवा जाधवर, पोहवा खेंगरे, पोहवा किर्वे तसेच सासवड पोलीस स्टेशनच्या पथकाने सहभाग घेतला. पुढील तपास पोसई अर्चना पाटील करीत आहेत.