बाल विकास मंदिर शाळेत योग दिन उत्साहात साजरा सासवड प्रतिनिधी : बापू मुळीक मुख्य संपादक पुरंदर प्राईम न्यूज: सासवड येथील म. ए. सो. बाल विकास मंदिर, येथे आंतरराष्ट्रीय योग दिनानिमित्त शाळेच्या आचार्य अत्रे सभागृहात विशेष योग कार्यक्रमाचे आयोजन करण्यात आले होते. या कार्यक्रमास शाळेचे मुख्याध्यापक भाऊसाहेब बडधे सर उपस्थित होते.यावेळी विद्यार्थ्यांना मार्गदर्शन करताना मुख्याध्यापकांनी योगाचे महत्त्व विशद केले. योगामुळे शारीरिक, मानसिक व बौद्धिक आरोग्य सुदृढ राहण्यास मदत होते, असा संदेश त्यांनी विद्यार्थ्यांना दिला.तसेच नरेद्र महाजन,स्वाती बोरावके,अमृता जगताप आणि क्रीडा शिक्षक नितीन ठोंबरे यांनी विविध योगासने व प्रात्यक्षिके विद्यार्थ्यांकडून करून घेतली.या कार्यक्रमात इयत्ता तिसरी व चौथीच्या एकूण 335 विद्यार्थ्यांनी उत्स्फूर्त सहभाग नोंदविला. विद्यार्थ्यांनी ताडासन, वृक्षासन, त्रिकोणासन, भुजंगासन, पद्मासन यांसारख्या योगासनांसह सूर्यनमस्कार आणि ध्यानधारणेची प्रात्यक्षिके सादर केली.कार्यक्रमाचे सूत्रसंचालन माणिक शेंडकर यांनी केले. योग दिनाचे महत्त्व व इतिहास याविषयीची माहिती दीपक कांदळकर यांनी विद्यार्थ्यांना दिली. आभार सुरेखा ओव्हाळ यांनी मानून कार्यक्रमाची सांगता करण्यात आली. योग दिनाचा हा उपक्रम विद्यार्थ्यांसाठी प्रेरणादायी व आरोग्यवर्धक ठरला.