सासवडकरांच्या समस्या आता 'ऑन द स्पॉट' सुटणार; महसूल प्रशासनाचा मोठा निर्णयलालफितीच्या कारभाराला चाप: आचार्य अत्रे सभागृहात उद्या रंगणार 'महाराजस्व समाधान शिबिर' सासवड प्रतिनिधी:बापू मुळीक मुख्य संपादक पुरंदर प्राईम न्यूज: सामान्य माणसाला तहसील कार्यालयाचे उंबरठे झिजवावे लागणारे दिवस आता संपणार आहेत. पुरंदर तहसील प्रशासनाने लोकाभिमुख कारभाराचा नवा अध्याय सुरू केला असून, उद्या शुक्रवार, दि. ८ मे २०२६ रोजी सासवड येथील आचार्य अत्रे सभागृहात 'छत्रपती शिवाजी महाराज महाराजस्व समाधान शिबिर' आयोजित करण्यात आले आहे. या एकाच शिबिरातून सासवड मंडल क्षेत्रातील शेकडो नागरिकांचे प्रलंबित प्रश्न निकाली निघण्याची शक्यता आहे.अनेकदा किरकोळ त्रुटींमुळे ७/१२ च्या नोंदी, वारस हक्क किंवा दाखल्यांची कामे महिनोनमहिने प्रलंबित राहतात. ही अडचण ओळखून तहसीलदार कार्यालयाने ही सर्व यंत्रणा थेट लोकांच्या दारात आणली आहे. सासवडच्या या विशेष शिबिरात केवळ अर्ज स्वीकारले जाणार नाहीत, तर त्यावर तात्काळ निर्णय घेऊन नागरिकांना दिलासा दिला जाणार आहे.दाखल्यांची चिंता मिटली: शैक्षणिक वर्ष सुरू होण्यापूर्वी विद्यार्थ्यांना लागणारे जातीचे, उत्पन्नाचे आणि रहिवासी दाखले 'कॅम्प मोड'वर देण्याचे नियोजन करण्यात आले आहे.शेतकऱ्यांचे प्रश्न: वारस नोंदी, जमिनीचे फेरफार आणि ७/१२ मधील दुरुस्तीसाठी शेतकऱ्यांना आता कार्यालयात फेऱ्या मारण्याची गरज उरणार नाही.योजनांचा लाभ: संजय गांधी निराधार आणि श्रावण बाळ योजनेचे लाभार्थी, जे अनेकदा माहितीअभावी वंचित राहतात, त्यांना या शिबिरात थेट मदत केली जाईल.सिंगल विंडो क्लिअरन्स: एकाच ठिकाणी सर्व टेबलवर कागदपत्रांची पडताळणी आणि मंजुरी.डिजिटल क्रांती: डिजिटल ७/१२ बाबत जनजागृती आणि डाऊनलोड करण्याची प्रात्यक्षिकेजागेवर पट्टे वाटप: घरकुल लाभार्थ्यांना प्रलंबित घरांच्या पट्ट्यांचे वाटप.या शिबिराचे सर्वात मोठे वैशिष्ट्य म्हणजे 'विवादास्पद फेरफार'. अनेक वर्षांपासून प्रलंबित असलेले जमिनीचे वाद सामोपचाराने आणि कायदेशीर प्रक्रियेने सोडवण्याचा प्रयत्न महसूल विभाग करणार आहे. तसेच, पाणंद रस्त्यांच्या दुरुस्तीसाठी आवश्यक प्रशासकीय मान्यता या शिबिराच्या माध्यमातून ग्रामपंचायतींना उपलब्ध करून दिल्या जातील."महसूल प्रशासन आणि जनता यांच्यातील अंतर कमी करणे हा या शिबिराचा मुख्य हेतू आहे," असे प्रशासनाकडून स्पष्ट करण्यात आले आहे. सासवड मंडल क्षेत्रातील नागरिकांनी या संधीचा लाभ घ्यावा, असे आवाहन तहसिलदार विक्रम राजपूत व मंडलाधिकारी सुहास कांबळे याकडून करण्यात आले असून उद्याच्या या महसूल 'दरबारा'कडे संपूर्ण तालुक्याचे लक्ष लागले आहे.